Ամերիկացիները պարզապես ցանկանում են, որ մենք զոհվենք դանդաղ. Սիրիական ազատ բանակի ղեկավար
The McClatchy մեդիահոլդինգին տված հարցազրույցի ժամանակ Սիրիայում ապստամբական ուժերի հրամանատար Սալիմ Իդրիսը խոստովանել է, որ իր զինված ստորաբաժանումները մասնատված են և չունեն ռազմական հմտություններ, որոնք անհրաժեշտ են նախագահ Բաշար Ասադին տապալելու համար:
Սիրիական ազատ բանակի ղեկավարը հայտարարել է, որ փորձում է բոլոր նահանգներում ստեղծել իր ուժերի ղեկավարման միավորված կառույց, սակայն չունի ո՛չ լուրջ ազդեցություն ապստամբների գործողության վրա, ո՛չ էլ ուղիղ վերահսկողություն՝ մի շարք խոշոր խմբավորումների նկատմամբ:
Դրա հետ մեկտեղ ապստամբների շրջանում գրեթե չկան արհեստավարժ զինվորականներ, ապստամբները չափազանց շատ գումարի կարիք են զգում: Իդրիսը հայտարարել է. «Մեզ չեն բավականացնում զենքն ու զինամթերքը: Բավական չեն նաև գումարները՝ լոգիստիկայի, վառելիքի գնման, ավտոմեքենաներով ջոկատներին համալրում հասցնելու համար: Մենք ոչինչ չենք կարողանում վճարել մարդկանց բողոքներին»:
ՄԱԿ-ում ցայժմ չեն դադարում վեճերը, թե արդյոք արժե՞ ապստամբներին զենք մատակարարել: Մարտի կեսերին Բրյուսելում տեղի ունեցած ԵՄ-ի գագաթաժողովում Ֆրանսիան ու Մեծ Բրիտանիան առաջարկել էին վերացնել ապստամբներին զենք մատակարարելու վրա դրված բեռնարգելքը: Սակայն դա լուրջ քննադատության տեղիք էր տվել:
Նշվում է, որ ԱՄՆ-ը և Թուրքիան պայմանավորվել են ստեղծել համակարգ՝ սիրիացի ապստամբներին 123 միլիոն դոլարի ոչ ռազմական տեխնիկա հատկացնելու համար: Սիրիական ընդդիմությունը ծիծաղելի է համարել ամերիկյան այդ օգնությունը. «Մեզ անհրաժեշտ է զենք: Ինչպես ասում է մեր հրամանատարներից մեկը, ամերիկացիները պարզապես ցանկանում են, որ մենք զոհվենք դանդաղ»:
